Четири брода со сончоглед, јачмен и пченица ги напуштија украинските пристаништа во средата, објави Заедничкиот координативен центар (JCC). Тие транспортираат вкупно 126.311 тони житарки и друга храна како дел од коридорот за житарки преку кој се извезуваат преку Црното Море, пренесува Аgroklub.
Два брода со 1.500 тони сончоглед и 18.100 тони пченица впловија во Турција. Во Франција ќе бидат испорачани 40.711 тони сончоглед, а во Шпанија 66.000 тони јачмен, пренесува Интерфакс.
Покрај тоа, бродот кој во средата помина низ поморскиот хуманитарен коридор во рамк на иницијативата, со товарот оди кон украинското пристаниште.
Повеќе од 110 бродови во мирување
Но, JCC напоменува дека дури 82 бродови за сув товар, кои можат да извезат околу 1,9 милиони тони храна, чекаат дозвола за влез во украинските пристаништа, а 30 чекаат инспекција во турските територијални води за да го продолжат патувањето до нивните дестинации.
„До 23 ноември, вкупната количина на житарки и други земјоделски производи извезени од три украински пристаништа е 11.853.507 тони. Вкупно 970 бродови имале дозвола да се движат: 479 за пристигнување во украинските пристаништа и 491 за заминување од нив“, наведува JCC.
Има три пристаништа низ кои оди овој транспорт, Одеса, Чорноморск и Пивдениј, а Украина бара да се додаде и пристаништето Миколаев. Сепак, тоа ќе биде можно само по деокупацијата на полуостровот Кинбурн Спит, пишува APKInform. Засега, поради можни артилериски закани од Русија, опасно е да се плови по тој пат.
