Цената на морскиот трговски превоз се зголеми неколкупати поради блокирањето на Суецкиот Канал каде што е заглавен товарен брод со контејнери, пишува Блумберг.
Според експертите на агенцијата, сè уште е тешко да се проценат загубите што ќе ги претрпи светската економија поради инцидентот во Суецкиот Канал.
До денеска, според Блумберг, стоки и нафтени деривати во вредност од над 10 милијарди долари се блокирани во Суецкиот Канал. Во исто време, кризата предизвика зголемување на цената на морскиот товар.
Доколку каналот остане блокиран неколку недели, танкерите кои испорачуваат нафта и нафтени производи од Блискиот Исток во Европа, можат да бидат пренасочени по алтернативна рута – околу ‘ртот Добра надеж. Според проценките на агенцијата, во тој случај трошоците за испорака ќе се зголемат за најмалку 300.000 американски долари, а тоа е количината на гориво што мора да се плати за секој танкер за да се помине растојанието од дополнителни 9.650 километри.
Да потсетиме, пред неколку дена беше запрен водениот сообраќај на една од најпрометните трговски рути на светот откако огромен товарен брод го блокираше Суецкиот канал заглавувајќи се под налет на силниот ветар.
Станува збор за тајвански брод кој бил на пад за Ротердам, долг 400 метри и широк 59 метри, кој се заглавил оневозможувајќи им на другите бродови да поминуваат низ каналот, пренесе „Би-Би-Си“.
Суецкиот канал ги поврзува Средоземното и Црвеното Море и прави најкратка морска врска меѓу Азија и Европа.
Извор: МИА
