Јубилејното 25. Издание на „Меѓународниот саем за земјоделство занаетчиство и индустрија Viroexpo 2020″ во Хрватска, е откажан поради опасноста од ширење на корона вирусот. Саемот требаше да се одржи викендот од 13. до 15. март и како што изјавуваат организаторите тој ќе се одржи на есен.
„Сметаме дека во овој момент на пандемија од корона вирусот тоа е една разумна одлука, бидејќи иако се е подготвено, нас на прво место ни е здравјето и сигурноста на нашите граѓани, на посетителите и на излагачите на саемот“, изјавил вировитичко-подравскиот жупан Игор Андровиќ, на состанокот на Организациониот одбор на „Вироекспо 2020“, објавуваат на страната на саемот.
Андровиќ истакнал уште дека е возможно спојување со „Агроекспо“. „Но за тоа дополнително ќе одлучуваме, а се зависи од тоа како ќе се одвива ситуацијата со корона вирусот во Хрватска но и во земјоте од каде што ни доаѓаат излагачите. Ако се биде во ред саемот ќе го одржиме на есен, ако не тогаш оваа година саем нема да има“ додаде тој.
Потсетуваме дека Националниот штаб за цивилна заштита на Хрватска , препорача да се одложат сите собири со повеќе од 1000 луѓе на неодредено време. Станува збор за вториот пакет мерки за заштита од потенцијалната зараза. Првиот пакет мерки е дека сите странски државјани кои влегуваат во земјата од подрачја што претставуваат жаришта, а тоа особено се однесува на Кина, Италија и Кореја, ќе бидат ставени во задолжителен карантин во траење од 14 дена.
„ На прво место ни е здравјето на граѓаните“ порача градоначалникот на Вировитица, Ивица Кирин.
Исто така излагачите се известени дека износот кој го уплатиле за да обезбедат изложбен простор, ќе остане како депозит за есенското издание на саемот. „И просторот кој го имале за периодот од 13 до 15 март ќе ги чека на есен“ потенцира директорот на саемот Бојан Мијок.
Откажани и саемите во Словенија
Поради опасноста од ширење на заразата од корона вирусот откажани се манифестациите кои исто така во текот на месец март требаше да се одржат на саемот во Цеље во Словенија. Станува збор за „Алтермед“, „Кулинарт“, „Флора“, „Порока“, „Аписловенија“, „Фестивал на кафето“,„ Во светот на риболовот“.
Извор :Агроклуб
