Владата на Република Србија денеска објави дека Четвртиот меѓународен саем за вино, храна, ракија и туризам „Винска визија на Отворен Балкан“ (Wine Vision by Open Balkan), еден од најголемите и најважните вински и гастрономски настани во Европа, ќе се одржи од 22 до 25 ноември на Белградскиот саем.
Таа манифестација е плод на иницијативата Отворен Балкан што ги поврзува Србија, Северна Македонија и Албанија. На неа оваа година ќе има повеќе од 600 изложувачи, што ќе презентираат вина, жестоки пијалоци, деликатеси и туристички понуди од Србија, регионот и региони од сите континенти.
За време на овој меѓународен настан, ќе бидат организирани низа едукации, работилници, мастер класи, натпревари и панел дискусии, како и уникатни дегустации, со оглед на тоа што бројни експерти за вино, носители на престижната титула „Master of Wine“, вклучувајќи го и претседателот на глобалната организација на експерти за вино, Институтот „Masters of Wine“, Род Смит МВ, го најавија своето пристигнување во Белград.
Покрај изложувачите, на Белградскиот саем ќе бидат присутни неколку стотици трговци со вино, увозници и дистрибутери од целиот свет.
Како и во претходните години, подготвена е посебна дигитална платформа за закажување B2B средби, што овозможува директен контакт и воспоставување деловна соработка во специјално опремен простор.
Во финалето на саемот, вина од Србија, Северна Македонија и Албанија ќе се натпреваруваат за титулата најдобри, а меѓународни експерти, меѓу кои и пет експерти со титулата Мајстор на виното, ќе ги дадат своите оценки. Покрај вината, ќе бидат презентирани и резултатите од натпреварот „Трофеј ракија“.
Исто така, како дел од кулинарскиот дел од саемот, ќе се одржи настанот „Визија за храна“ (Food Vision), посветен на регионалната гастрономија и угостителство. Посетителите ќе имаат можност да следат натпревари во готвење и други активности.
МИА
