Неформалниот дијалог меѓу Обединетите нации и потписниците на Црноморскиот договор за жито ќе продолжи, изјави денеска портпарол на Обединетите нации, додавајќи дека разговорите со Русија за ова прашање се завршени.
– Разговорите завршија вчера како што беше договорено, но консултациите продолжуваат со сите страни, изјави портпаролот на хуманитарната канцеларија во Обединетите нации која ја води заменик-генералниот секретар на ОН Мартин Грифитс.
Грифитс и највисоката функционерка на ОН за трговија, Ребека Гринспен, се состанаа со главниот претставник на руското Министерство за надворешни работи, Сергеј Вершинин вчера во Женева, каде што рускиот претставник предложи продолжување за 60 дена, наместо за 120.
Тоа го потврди и заменик министерот за надворешни работи на Русија Александар Грушко.
Тој рече дека е потврдено оти договорот е дел од пакетот и дека условот е да се исполнат сите ветувања дадени на руската страна.
Според Грушко, Руската Федерација ќе продолжи да бара отстранување на сите пречки за испорака на земјоделски производи на светските пазари.
Договорот потпишан на 22 јули 2022 година од претставници на Русија, Турција, Украина и ОН вклучува извоз на украинско жито, храна и ѓубрива од три пристаништа на Црното Море, вклучително и Одеса.
Заедничкиот координативен центар во Истанбул е одговорен за координација на движењето на бродовите.
Договорот истече на 18 ноември минатата година, но неговите услови вклучуваа автоматско продолжување од 120 дена доколку немаше забелешки од ниту една страна.
Самиот договор за жито е составен дел од пакетот, кој, меѓу другото, предвидува деблокирање на извозот на руска храна и ѓубрива.
Москва истакнува дека овој услов не бил исполнет и покрај уверувањата на ОН.
