Со големиот број сорти и хибриди кои се разликуваат по боја, форма и вкус, доматите ја стекнаа наклоноста од многу градинари. Одгледувањето домат е вистински предизвик бидејќи плодовите се карактеризираат со различен степен на сладкост.
Покрај правилниот избор на сорта, на вкусот на доматите влијаат и разни надворешни фактори како што се типот на почвата, сонцето, влажноста, температурата, снабдувањето со хранливи материи, појавата на растителни болести, нападот на штетниците.
Навременото сеење влијае на квалитетот на доматот
Треба да се внимава при изборот на семето. Некои сорти даваат послатки плодови. Колку е поголем плодот, толку е помала неговата сладкост. Ако сакате да изберете сорти и хибриди кои се карактеризираат со поголем интензитет на сладкост и специфична арома, изберете ги оние со помал плод или чери-доматите.
Треба да се внимава семето да биде прилагодено на постоечката микроклима. Сортите од другите климатски области може да не бидат прилагодени на агро-климатските услови во одредено поднебје.
Друг важен фактор е времето на сеење. Доматот се сее во затворено и топло место. На овој начин, на растенијата ќе им се овозможи во услови на постоечка клима да формираат плодови што ќе дозреат. Засадувањето на негуваниот расад се врши кога ќе помине опасноста од доцни мразови.
Прихрана богата со калиум
Посевите со домати се голем потрошувач на хранливи материи, особено калиум во текот на формирање на плодовите. При садењето и одгледувањето на доматите обезбедете доволно хранливи материи во почвата, особено органски. Во периодот на дозревање, прихраната дополнете ја со хранливи материи богати со калиум. Прилагодете го наводнувањето на состојбата во текот на периодот на вегетација.
И плодовите се чувствителни на промените во содржината на влага во почвата. Кога по сушен период паѓа силен дожд или обилно наводнуваме, честопати се случува поради наглото навлегување на водата да се појави пукање на површината. Настанатите пукнатини се идеални за појава на разни болести или напад на штетници, што доведува до послаб квалитет на зеленчукот. Поради оваа причина, важно е снабдувањето со вода да биде избалансирано.
Ни вишокот влага во почвата не влијае поволно на наведените особини. Тогаш плодовите стануваат воденести, а квалитетот и вкусот се полоши.
Некои растителни видови засадени покрај доматот позитивно влијаат на неговиот вкус. Покрај доматот засадете босилек за подобрување на вкусот на овој зеленчук.
Заштитата на посевите со домати исто така игра важна улога. Доматите што растат на сончево место даваат послатки и поквалитетни плодови. Највкусни се доматите произведени на природен начин, каде заштитата се врши со примена на биолошки препарати и редовно спроведување на превентивни мерки.
Најголемиот непријател на добриот вкус на доматот е појавата на пламеница, затоа треба да се обрне внимание на превентивните и заштитните мерки од моментот кога ќе почнеме да сееме до берењето, пренесува Агроклуб.
Напишете коментар