Општина Гевгелија со финансиски средства од сопствениот буџет ќе учествува во реализацијата на проектот за подобрување на водоснабдувањето во планинското село Ума чиј сегашен резервоар не ги задоволува потребите, особено во сушниот период.
Проектот предвидува изградба на заштитен објект до постоечкиот резервоар во селото Ума, во кој ќе биде поставена пумпна станица и ќе биде инсталиран доводен цевковод затоа што сегашниот водоводен систем генерално не ги задоволува потребите во селото во деновите на престој на викендаши.
– Со изградбата на новиот дренажен зафат, пумпна станица и нов потисен цевковод до постоечкиот резервоар во селото, сметаме дека целосно ќе биде исполнето барањето на жителите за подобрување на водоснабдувањето во планинското село Ума, за чие што решавање Општина Гевгелија ќе одвои 3,5 милиони денари, велат од општината.
Вредноста на сите планирани активности е проценета на 20,3 милиони денари од кои поголемиот дел, поточно 16,8 милиони денари, обезбедува Бирото за регионален развој, а останатите 3,5 милиони денари од буџетот на Општина Гевгелија.
Извор: МИА
