Цените на житарките продолжуваат да растат. Во петокот на европскиот пазар се тргуваше со новата реколта по цена од 417 евра за тон, а во Хамбург за лебната пченица беа понудени 420 евра за тон, наведува Агрархеуте. Во новата недела влеговме со нов скок на цените. MATIF почна со 430 евра за новата реколта.
Се очекуваше Индија годинава да пријави рекордни количини и со тоа да го компензира дефицитот на светскиот пазар. Меѓутоа, екстремниот топлотен бран ја намали жетвата во производствените региони и ги подигна цените на рекордно ниво на домашниот пазар. Владата вети дека ќе дозволи извоз на жито според претходните договори.
И додека Индија го запира извозот поради високите температури и рекордните цени, американското Министерство за земјоделство (USDA) ја процени претстојната жетва на 108,5 милиони тони, а извозот на 8,5 милиони тони, и покрај топлотниот бран.
Дека пазарот не мирува во САД покажува и растот на фјучерсите на пченицата во Чикаго, кои во понеделникот пораснаа за шест отсто од дневниот лимит откако Индија го забрани извозот, а домашните цени достигнаа рекордно високо ниво. Аналитичарите го критикуваат очекуваното зголемување на производството на оваа житарка од страна на американскиот Стејт департмент, каде што последното истражување објавено минатата недела покажа дека 39 отсто од зимските залихи се во лоша и многу лоша состојба, двојно повеќе од претходната година.
И приносот во Украина ќе биде помал. USDA во својата прва прогноза за новата жетва 2022/23 прогнозира дека Украина ќе има една третина помалку пченица и дека производството на пченка ќе опадне за 54 проценти. Според нивните проценки, руското производство на пченица се очекува да се зголеми за повеќе од шест отсто, што би ја ставило Русија на позицијата водечки светски извозник на оваа житарка со околу 39 милиони тони или 19 отсто од светската трговија.
USDA предвидува глобални залихи на крајот на производниот циклус на 279 милиони тони, што е за 4,1 отсто помалку од претходната година, а до крајот на следната сезона повторно ќе се намали за 4,3 отсто на 267 милиони тони.
Во Канада се очекува добра жетва
Падот на приносите во Австралија ќе се надомести со добрата жетва во Канада каде што се очекува принос од 33 милиони тони.
Прогнозите не се оптимистични кога станува збор за Европската Унија каде што сушата ги мачи земјоделците во Франција и Германија. Се очекува умерен пад на новата жетва на тврда и лебна пченица од 138,4 милиони тони на 136,5 милиони тони.
