Деновиве претставници на навивачката група „Балисти“ и футсал-клубот „Шкендија“ работеа на отстранување на фрлените отпадоци во реката Пена во Тетово. Акцијата се одржа на делот од реката во близина на Шарена џамија. Тие влегуваа во реката и ги вадеа отпадоците надвор од речното корито, а работници на комуналното претријатие ги собираа и пренесуваа.
– Сакаме да му помогнеме на градот да биде поубав и почист, затоа е оваа иницијатива. Граѓаните да не фрлаат смет во реката. Планираме да се извадат отпадоци од кај Шарена џамија до мостот на булеварот „Индустриска“, изјави Башким Идризи, претставник на навивачката група.
Претходно членови на навивачката група во соработка со одбојкарскиот клуб „Шкендија“ Тетово се ангажираа да им делат вода на луѓето што чекаа да се вакцинираат и на медицинскиот персонал, во пунктовите за вакцинација.
Реката Пена е место каде редовно граѓаните фрлаат смет, а често пати се остава и мебел, градежни материјали и други вид цврст отпад.
Извор: МИА
