На третиот крапски риболовен натпревар одржан викендов на Осломејско Езеро најдобра беше екипата „Мак –Дам“ од Куманово која улови вкупно 65.180 килограми крап. Второто место и припадна на екипата „Урбан крап“ од Охрид, а на трето место се пласира екипата „Карп Тим“ од Косово.
– По три дена, екипата на „Мак –Дам“ од Куманово со вкупен улов од 65.180 кг. се пласира на првото место. Риболовците од оваа екипа уловија вкупно 23 примероци на крап. Второто место и припадна на екипата „Урбан крап“ од Охрид со вкупен улов од 40.710 кг., додека третото место за екипата Карп Тим Косово со вкупен улов од 29.000 килограми или вкупно уловени 8 примероци на крап, изјави Бесмир Елези, претседател на риболовното друштво „Хантер Фиш“ од Кичево, организатор на натпреварот.
Најкрупниот примерок на крап го уловил риболовец од екипата на Косово со тежина од 6.650 кг.
Елези посочи дека најдобрите екипи освоиле и највисоки парични награди досега.
– Покрај пехари и медали обезбедивме и највисоки парични награди досега. Најдобрата екипа е наградена со 30.000 денари, второпласираната со 18.000 и третопласираната со 9.000 денари. Целиот натпревар помина во фер и спортска борба, рече Елези.
Во трите дена беше остварен вкупен улов на крап од 275.850 кг. или риболовците уловиле 101 примерок на крап.
МИА
