Јапонската компанија „Sanatech Seed“ овој месец започна со продажба на домати чиј геном е регулиран со технологија позната како CRISPR-Cas9, пишува AFN. Засега ќе биде достапен само за клиентите во Јапонија.
Станува збор за домат од сортата Sicilian Rouge кој е геномски распореден да содржи високо ниво на гама-аминобутерна киселина (ГАБА), невротрансмитер кој се синтетизира во мозокот каде што ја намалува стимулацијата на нервниот систем.
Неодамна, две студии од Јапонија докажале дека во форма на додаток во исхраната може да има корисен ефект врз меморијата и когнитивните функции во разбирањето на просторните односи. Според ISAAA, се верува дека го намалува крвниот притисок и има релаксирачки ефект врз телото.
Не се ГМО?
Според Шимпеи Такешит, претседател на оваа компанија, нивните домати содржат четири до пет пати повеќе ГАБА отколку обичните. За да се зголеми ова ниво, компанијата користела технологија CRISPR-Cas9 за да ги отстрани домените во геномот на доматот кои дејствуваат како блокатори за производство на споменатата киселина.
Така, овој метод им овозможува на научниците на точно одредено место во ДНК да отстранат некој дел, да го инактивираат или да го заменат со друг.
Според научните истражувања, ова им дава на културите подобар вкус, подолг рок на траење и/или подобра толеранција на суша. Научниците напоменуваат дека овој метод не е ист со ГМО бидејќи не вклучува ДНК од други живи организми.
Од компанијата „Sanatech Seed“ во соопштението навеле дека на глобално ниво ќе продолжат да споделуваат искуства за позитивното влијание на генетски модифицираните култури, како и да развиваат нови сорти за задоволување на потребите на потрошувачите и производителите. Во блиска иднина, тие планираат да направат пире од домати од оваа сорта.
