Младиот Климент Алексов од виничкото село Трсино неодамна се поднови со нов трактор и за тоа се пофали на социјалните мрежи. Тоа беше поводот да го прашаме, како е да имаш 24 години и да си среќен што купуваш нов трактор, наместо некој добар автомобил?
– Па мислам дека тракторот побрзо ќе ги врне парите и побрзо ке купам автомобил- ни одговори Климент.
Подоцна низ разговор дознавме дека тракторот е набавен преку ИПАРД 2 што значително ја олеснува инвестицијата, но сепак желбата да се занимава со земјоделско производство и инвестициите во неговата фарма „КЛИМЧЕ“, зборува за одлучност на млад човек да успее со својот бизнис.
-Работам земјоделие откако знам за себе. Од мал возев комбајн кај еден газда во друго село кој ми ја пренесе љубовта кон земјоделството. Неговите зборови беа пресудни да се занимавам со земјоделско произодство. Секогаш ми велеше, полека, мора да имаш трпение и ќе успееш. Така и се случи. Почнав буквално со една крава и 1 хектар наша земја, потоа добивме под концесија и сега обработувам 15 хектари, дел јачмен, еден дел пченица, пченка и луцерка. Целата храна што ја произведуваме ја користиме за нашата фарма со 15 крави. Но земјата ни е малку, бидејќи планираме да ја зголемиме фармата со високомлечни крави и затоа сега подготвуваме документи за јавниот повик кој е во тек за површини до 3 хектари. Исто така започнуваме и со фарма за свињи, од 5 мајки планираме да стигнеме до 50 мајки – раскажува Климент.
Неговите родители работат во конфекции во Виница, но сепак вели, има помош од татко му и еден работник осигуран цела година, а во сезона ангажираат дополнително уште двајца работници.
-Сега не е тешко да се работи земјоделие, се е механизирано, не ринеш рачно, не молзеш рачно, не ги хранеш рачно, ранеш ги со микс приколица… после си слободен и имаш време за се’ и за кафе со другарите. Млекото го даваме на млекара „Малеш“ од село Смојмирово – Берово со кои имаме склучено договор – вели Климент и продолжува со плановите за иднина на неговата Фарма „КЛИМЧЕ“.
-Јас мислам дека има услови за развој на агробизнис кај нас и затоа се чудам на моите врсници што одат во странство да работат кај други газди кога можат да почнат тука. Користиме субвенции за целата обработлива површина, а лани аплициравме за ИПАРД 2 за земјоделска приклучна механизација во вредност од 6000 евра. На сето тоа имаме 75 % повраток на парите. Исто и за тракторот. Тоа е поволноста што има вакви мерки да се дојде до нови трактори или нова механизација. Инаку и јас бев едно лето во Италија да видам како се работи таму и навистина има што да се научи. Нови технологии, сорти и начини на производство. Кога се вратив дома и наредната година стариот овоштарник го променив со нови насади – вели Климент.
Приказната ја завршува низ шега дека е подобро сам свој работник и газда, отколку било што друго да се работи.
Се надеваме дека неговите амбиции ќе се исполнат, дека набргу ќе ги смести кравите во новата фарма која ја гради и ќе продолжи да биде мотив за други млади да започнат свој агробизнис.
‘
