На нешто повеќе од 100 ха површина, земјоделецот Митат Исмаиловски од село Будаково, има засеано пченица. Деновиве објави фотографии кои покажуваат дека посевите се во добра состојба и ако времето послужи, очекува богат род.
-Моментално кај мене посевите се во одлична состојба затоа што навреме се насеани и се извршени сите агротехнички мерки. За жал годинава насеав само на 113 ха, а планирав 300 ха ако беше цената на пченицата добра. Но со таа цена, не се исплати да се вложува во ова производство – изјави за Агротим, Исмаиловски.
Според него и другите земјоделци ги намалиле површините под пченица и се ориентираат кон други култури.
-Иако се најавуваше дека пченицата како стратешка култура ќе ја субвенционира државата повеќе од другите, сепак тоа не е доволно и затоа јас и други земјоделци немаме математика вака да ја произведуваме. Штом не е сигурен пласманот, ризично е да се сее на непознато – вели Исмаиловски.
Неговиот избор за производство на останатите површини со кои располага е со култури за кои има Договорно производство.
-Ќе склучиме договор за производство на бессемена лубеница, сончоглед и тутун. Моментално тие се поисплатливи производства и можеме да си планираме оти однапред знаеме кој ќе го купи родот и по која цена. Инаку најисплатлив моментално е тутунот, но многу е мачен за работа, во еден ноќе треба да стануваш и цел ден до 22 часот има работа. Планираме со фамилијата да насадиме на 2 ха површина од тип Прилеп, се надевам дека ќе биде добра сезоната. Секоја година тоа што ќе го заработиме го инвестираме повторно во земјоделското производство – вели Исмаиловски.
Во секој разговор со него не пропушта да даде критика за немањето долгорочна стратегија во земјоделството која не треба да се менува со менување на Владата.
-Ако сакаме младите да ги задржиме тука, мора да се обрне внимание на земјоделството, да се даваат повисоки субвенции, да се мотивираат младите, да има сигурен пласман и добра цена. Инаку ние можеме да произведеме и да се рамниме со европските земјоделците со нашето знаење и искуство. За моите слики кога ќе ги објавам на ФБ ме прашуваат пријатели каде е ова, дали е во ЕУ? А јас им одговарам, во МАЈКА МАКЕДОНИЈА – вели Исмаиловски.
