ИПАРД фондови: Мерка 7 -Диверзификација на фармите и развој на бизниси

Повикот за Мерка 7 од ИПАРД 2 се очекува да биде во првата половина на годината. Имате доволно време за да се информирате за што се може да се аплицира, какви услови треба да се исполнат и кои документи се потребни.

Целосните информации ќе ги има откако ќе излезе повикот, но генерално ова се основните информации за Мерка 7 – Диверзификација на фармите и развој на бизниси.

Апликации може да спремите преку Консултантската фирма АГРОКУЛТУРА. Повеќе информации на телефон 071 381 453.

Корисници

Физички лица;
Правни лица (микро и мали претпријатија);
Задруги.

Приоритетни сектори

Алтернативно земјоделско производство – (одгледување на печурки и тартуфи, хортикултура, производство на семенски и саден материјал, одгледување на зајаци, полжави, птици за јајца и месо – патки, гуски, мисирки тетреби, ноеви, емуа и бисерки, дивеч, пчели, одгледување на зачински и ароматични растенија, насади на дрвја за дрвена граѓа и био-маса (брзо растечки), аквакултурни фарми за слатководна риба.
Производство на прехранбени производи и пијалаци – (со исклучок на инвестиции кои се прифатливи по другите мерки од ИПАРД Програмата)
Производство на не-прехрамбени производи – (сите дејности согласно листата на дејности која е Прилог 14 на ИПАРД Програмата)
Развој на занаетчиски активности – (во согласност со Правилникот за начинот на определување на активности кои можат да се вршат со занаетчиство)
Обезбедување на услуги во земјоделството – (ветеринарна дејност, работилници за одржување и поправка на земјоделска механизација и опрема, услуги за изнајмување на земјоделска механизација и машини)
Развој на услуги за руралното население – (услуги за поправка и одржување, за престој и нега (домови за стари лица, за рехабилитација, итн), за дневно згрижување на деца, образовни, информатички, спортско-рекреативни центри и сл.)
Промоција на руралниот туризам – (сместување во соби, апартмани, кампови, бунгалови, готвење и служење на храна, соби за дегустација/продажба, рурални музеи, простории за семинари/обуки, едукативни фарми, рекреативни активности за туристите)
Производство и продажба на енергија од обновливи извори: (соларна и ветерна енергија, преработка на растителни и животински производи од примарна и секундарна биомаса, освен биомаса од рибни производи, производство на био-гориво, преработка на шумска биомаса).

Стандарди

На крај на инвестицијата потребно е да се достигнат минималните национални стандарди за:

Јавно здравје;
Благостојба на животните;
Безбедност на храна;
Заштита при работа;
Заштита на животна средина.

Во зависност од специфичната економска дејност на барателот потребно е на крајот на инвестицијата да бидат исполнети сите барања согласно националното законодавство.

Сопственост на земјиште/објекти

За земјиштето и/или објектите кои се предмет на инвестицијата барателот треба да докаже:

Сопственост или
Договор за закуп (најмалку 7 години од денот на поднесување на барањето);

Специфични критериуми

Инвестициите во градба/реконструкција за туристички цели во рурални средини мора да го следат традиционалниот стил на градба.

Доколку барателот е физичко лице, инвестициите во градба/реконструкција за туристички цели за сместување и/или ресторански услуги се ограничени на:

10 соби (20 гости);
10 сместувачки единици за сместување на отворено (30 гости);
50 гости за ресторански услуги.

Доколку барателот е правно лице, инвестициите во градба/реконструкција за туристички цели за сместување и/или ресторански услуги се ограничени на:

20 соби (50 гости);
30 сместувачки единици за сместување на отворено (90 гости);
150 гости за ресторански услуги

Економска одржливост

Економската оддржливост на инвестицијата барателот ја докажува преку:

Технички предлог проект (за инвестиции до 50.000 €);
Деловен план (за инвестиции над 50.000 €)

Прифатливи инвестиции

Градба/реконструкција на објекти и друг недвижен имот кој се користи за прифатливите економски активности;
Набавка и/или инсталирање на нови машини и опрема поврзани со прифатлива економска активност;
Набавка на наменски транспортни резервари и приколки;
Набавка на повеќегодишни дрвја и растенија (со исклучок на семе, саден материјал и мицелиум);
Набавка на нови машини и опрема за заштита на животната средина вклучувајќи опрема за производство на електрична енергија и/или греење со употреба на обновливи извори на енергија;
Инфраструктурно уредување.

Висина на финансиска поддршка

Висината на финансиската поддршка изнесува 65% од вкупните прифатливи трошоци на инвестицијата.

Минимална вредност на вкупните прифатливи трошоци за инвестициски проект – 1.500 €
Максимална вредност на вкупните прифатливи трошоци за инвестициски проект – 1.000.000 €

Идни инвестиции

Барателите може да поднесат повеќе проекти во рамки на оваа мерка во текот на спроведувањето на Програмата, под услов максималните вкупни прифатливи трошоци (до 1.500.000 €) да не бидат надминати и претходните проекти да бидат реализиарни (исплатени на корисникот).