Италијанската економија би можела да забави наредните децении поради ризиците што ги носи порастот на температурите, засегнувајќи ги во најголем обем земјоделството и туризмот како стопански дејности, предупреди Централната банка.
Италија веќе ги чувствува последиците од климатските промени и во јули Владата прогласи вонредна состојба во долината на реката По, што сочинува речиси третина од земјоделското производство и ја забележа најголемата суша во последните 70 години.
Во туризмот најмногу ќе страдаат туристичките центри поврзани со зимските спортови, бидејќи помалку посетители ќе доаѓаат на Алпите да скијаат поради помалите количини снег, покажува истражувањето спроведено од Централната банка на Италија.
Од последиците од климатските промени ќе страдаат и другите сектори, со зголемини шанси за пропаѓање на компании во делови од државата каде има зголемен ризик од одрони и поплави.
Од банката се предупредува и на влијанието на високите температури и загадувањето врз студентите и работниците, бидејќи во екстремно топлите периоди забележани се полоши резултати на испитите кај студентите, како и зголемен број повреди на работни места во услови на влошен квалитет на воздухот.
Истражувањето проценува дека бруто домашниот производ на Италија по глава на жител може да падне меѓу 2,8 и 9,5 отсто до 2100 година поради климатските промени.
