Катарина Георгиевска е сопственичка на капацитетот за селски туризам „Ранчо и Ванчо на Ката“ во село Оморани, кој заедно со нејзиниот сопруг го отвориле пред десетина години. Во нивниот мал рај, доаѓаат гости и од нашата земја и од цел свет, кои на Ранчот можат да уживаат во мирот и природата, како и во вкусната храна спремена со свежи локални производи и подготвена по традиционални рецепти.
Во рамки на манифестацијата за „Избор на најуспешни во областа на земјоделството“ во организација на ЗЗ „Современо земјоделство“, Катарина доби признание за Промотор за развој на руралниот туризам.
„Особен интерес посветив на овој регион што е наречен Азот, како еден од најнеразвиените региони во Македонија, но и еколошки чист регион од аспект на животната средина. Тука нема индустриски сектор, нема потенцијални загадувања врз животната средина, а тоа значи природен начин на живот, органска храна. Ова село Оморани ме плени со својот изглед и одлучив дека ова е местото каде што ќе основам селски туризам.“, вели Катарина.
Катарина вели дека животот во Скопје ѝ станува сѐ потежок во смисла на загадувањето што постои во градот, гужвата, бучавата, стресните и агресивни релации помеѓу луѓето и затоа решила да инвестира во Оморани.
„Овде буквално живеете како да сте на еден рај на земјата. Овде има многу подобар квалитет на живот, секако доколку знаете во услови на една селска, рурална средина, да си ги обезбедите сите инфраструктурни потенцијали, инфраструктурни објекти
Следен предизвик за Катарина е „глампинг“ туризмот, кој планира да го развива во Оморани.
„Глампинг туризам е кованица на англиски јазик од два збора. Едниот е „glamorous“ (гламурозен), а другиот е „camping“ (кампирање), што значи чувство на доживување на природата некаде во камп, во природа, каде што нема гужва, каде што е мир и тишина, меѓутоа со сите услови на едно комформо, луксузно, гламурозно живеење.“, објаснува Катарина.
Ранчот е претставен на платформите Booking и Airbnb за резервации за сместување и има многу позитивни препораки.
„Селскиот туризам во нашата земја може да претставува една одлична и бескрајна економска гранка за развој на локалното население во руралните средини“, вели Катарина.
