Винаријата „Fattoria Lavacchio“, на еден час возење од Фиренца, е една од ретките што произведува органско вино во регионот на Тоскана. Чокотите се стари од 15 до 59 години, а виното што се добива од нив, покрај во Италија и европските земји, стигнува и до купувачите во Соединетите Американски Држави и Канада.
Оваа винарија се наоѓа на поголема надморска височина во однос на лозовите насади каде што се применува конвенционално производство.
Најголем проблем секако е плевелот, вели Рикардо Марки, кој е задолжен за производство и заштита на лозовите насади. Тие го косат плевелот, но и често го копаат бидејќи постојаното косење само им го зајакнува коренот.
„Оди и до 1,5 метар длабочина. Еден ред меѓу чокотите го оставаме затревен додека другиот го фрезираме за што повеќе да ја намалиме јачината на корените на плевелот. Фрезираме грав, житарки и мешунки кои ги користиме како ѓубриво, а ги косиме и фрезираме на крајот од нивната вегетација“, вели Марки. Користат и кравјо ѓубриво, органско, од блиската фарма.
Винаријата нема систем за наводнување, па годинава поради екстремно сушното лето родот бил за 20 отсто помал од годините кога имало доволно дожд.
Намалена употреба на бакар
Во нормални години приносот изнесува шест тони по хектар. Оваа година Марки измерил температура од 52°C на височина од 10 сантиметри над земјата. Комплицирана е и заштитата.
„Користиме бакар и сулфур. До пред неколку години користевме бакар во количина од шест килограми по хектар годишно, а сега го намаливме на четири килограми. Кога ќе искосиме дел од житарките, гравот и мешунките, ги потопуваме во вода, а потоа со тоа ѓубриво ги прскаме чокотите“, објаснува Марки, пренесува Agroklub.
Тој наведува дека често имаат проблем со гроздовиот молец, но успеваат да го контролираат. Поволно е и тоа што областа е доста ветровита, па нема многу проблеми со пламеница и пепелница, за кои како индикатор ги користат розите.
Не планираат зголемување на производството
Винаријата „Fattoria Lavacchio“ произведува винова лоза на 25 хектари, а се произведува и масло од 12.000 маслинови дрвја. За преработката е задолжен Тацухико Озаки. Користат органски квасци, а грозјето се ферментира од седум до 10 дена.
„Гроздовите не се мелат, туку се ставаат цели во резервоарите. Ние користиме топла вода за да ги активираме ензимите, а резервоарите ги дезинфицираме со каустична сода и водород пероксид. Виното го чуваме пет месеци во дрвени буриња. Нема потреба да се гмечи грозјето, како што често се гледа во филмовите“, со насмевка истакнува Озаки.
Годишното производство е 120.000 шишиња вино. Немаат намера да го зголемат производството бидејќи не сакаат да ги менуваат проверените рецепти за производство на бели, црвени и розе вина со врвен квалитет, како и на маслиновото масло.
Посетителите на оваа винарија можат да престојуваат во луксузен хотел, изграден во италијански етно стил, каде што можат да ги пробаат производите, а останатите содржини околу хотелот се дизајнирани за уживање и врвна забава.
