Во Гевгелија денеска ќе се одржи јавна трибина „Актуелни состојби и еколошки предизвици на Вардарскиот речен слив“, на која ќе бидат презентирани клучните наоди од мониторингот и документот за јавни политики „Од локални инциденти до потенцијална екокатастрофа: како да се подобри управувањето со водите во Вардарскиот речен слив“.
Како што велат организаторите, документот нуди препораки за јавните политики и институционалната координација.
Според теренскиот мониторинг на група екоактивисти спроведен минатиот месец, речиси сите реки на Вардарскиот речен слив се во загрижувачка еколошка состојба. Во Брегалница, Конска/Сува Река, Каменичка Река, Кумановка, Пчиња и Вардар се констатирани директни канализациски и индустриски испусти, диви депонии во речните корита и ризик од излевање на рударско хидројаловиште. Утврдените состојби не се изолирани инциденти, туку укажуваат на системски слабости во управувањето со водите.
-Теренскиот мониторинг укажува на четири доминантни и повторливи категории на притисок врз водните ресурси во Вардарскиот речен слив. Тие се манифестираат преку испуштање нетретирани отпадни води, нелегално депонирање цврст и градежен отпад во и покрај водотеците, присуство на структурни ризици поврзани со стари депонии, фарми, индустриски капацитети и јаловишта, како и деградирана или оштетена инфраструктура што дополнително го влошува квалитетот на водите и ја зголемува ранливоста на водните екосистеми, наведува Центарот за еколошка демократија ФЛОРОЗОН.
МИА
