„Стоката е надвор, магацините се полни, купувачи нема. Половина од нашите компири се наоѓаат сеуште во полињата и не се извадени, се прашуваме треба ли воопшто и да ги вадиме“, раскажува Иванка Иванова земјоделка од село Продановци кај Софија.
Илјадници тони на компири во Бугарија скапуваат во магацините и на нивите бидејќи за жал, за нив нема пазар. Зошто? Продавниците се преплавени со евтини компири од Грција и Романија, а извозните цени од недела во недела се, се пониски.
Слична е ситуацијата и на семејното земјоделско стопанство на Димитрина Благоева и Тодор Џиков. – „Не се сеќавам на ваква ситуација а произведуваме веќе 20 години“, истакнува Благоева која одгледува компири на 200 хектари. Џиков предупредува дека кризата се проширила на сите планински и полупланински региони во оваа земја.
Влијание на пандемијата
Да се потсетиме дека уште во мај, кризата со корона вирусот доведе до тотален колапс на цената на компирите во повеќето европски земји. Во Белгија фармерите побарале од целата нација да јаде помфрит два пати неделно. Во нивните магацини биле натрупани околу 750.000 тони од овој зеленчук, а главна причина за тоа е затворањето на рестораните, градинките, училиштата и другите установи каде што се пласирале компирите. Исто така цената за 100 килограми компири достигнала историски минимум од едно евро.
Големи проблеми со пазарот имаше и во Франција. Таму во магацините имало 500.000 тони компири кои ги чекале своите купувачи. Од почетокот на ширењето на корона вирусот германското здружение на производители на компири (DKHV) се залага за давање поддршка за трговците и цела германска индустрија поврзани со оваа намирница. Освен редовната комуникација со членовите, задругата ја информирала јавноста за добрата ситуација околу снабденоста и го смирувала паничното однесување на купувачите.
Евроспката организација на земјоделци COPA-COGECA ја предупреди писмено Европската комисија, дека овој сектор е меѓу најтешко погодените со кризата на корона вирусот. Тие процениле дека штетата кај производителите во ЕУ достигнала 400 милиони евра. Инаку, во текот на последните пет години површините под оваа култура значително се зголемија, особено во Франција и Германија како резултат на се поголемата побарувачка, наведува europatat.eu.
Според Задругата на одгледувачи на компири во северозападна Европа (NEPG), минатата година во Белгија, Франција, Германија, Холандија и Велика Британија се собрани 26,8 милиони тони компири од рекордни површини кои зафаќаат 613.946 хектари.
Извор: agroklub.com
