Голем интерес има кај кавадаречките и росоманските земјоделци за легализирање на државно земјиште што го користеле бесправно во изминатиот подолг период, за МИА потврди Драганчо Николов, советник во Подрачната единица на Агенцијата за поттикнување на развојот во земјоделството во Кавадарци.
-Има исто така интерес за земање под закуп и на државно земјиште кое досега не се користело. Земјоделците се обраќаат кај нас по јавните повици на Министерството за земјоделство, шумарство и водостопанство. Во подрачната единица ние им изготвуваме програми за користење на земјоделското земјиште, до три и над три хектари. Сите услуги им ги даваме бесплатно – појасни Николов.
Тој нагласи дека со ова регулирање, земјоделците добиваат право за субвенции и други финансиски поддршки од државни и странски фондови.
Извор: МИА
