По објавувањето на проектот за Договорно производство на органска пиперка и репортажата за еден од учесниците во проектот – земјоделецот Живко Стојчев од Аџиматово, се зголеми интересот на останатите земјоделци за овој начин на производство.
Советничката за органско производство, Ангела Ѓероска, денеска беше во посета на земјоделски производители од село Бучин, на нивно барање, за да добијат повеќе информации околу можноста да се вклучат во проектот.
-Интересот е голем, секојдневно добивам повици од земјоделци со кои соработувам изминативе години и со кои се обидуваме да ги зголемиме површините и производството под органска храна. Земјоделците од Бучин се едни од нив – вели Ѓероска и додава дека во село Бучин веќе има производител кој се вклучи во проектот Договорно производство на органска пиперка 2021.
Договорнотo производство на органска пиперка започна оваа 2021 година на иницијатива и организација на Агротим, а во соработка со земјоделци, преработувачки капацитети и со поддршка од Швајцарската агенција за развој и соработка преку Програмата за зголемување на пазарната вработливост – И.М.Е Програма..
-За производителот Алексо Козевски веќе е познато органското производство. Трета година не користи хемиски препрати, па така лесно се реши да започне со органско производство. Оваа година дополнително плус ќе му бидат и 100% повисоки субвенциите. Има склучено договор со фирмата „Тргопродукт“ и засади 5 декари под органска пиперка. Пиперот е веќе расаден и е во одлична кондиција. Задоволен е од постигнатиот договор за откуп на пиперката по 30 денари за килограм и воопшто за односот на откупувачот и тоа искуство им го пренесе и на другите производители – вели Ѓероска.
