Селото Ојмјакон во далечниот источен дел на Сибир се смета за најстудено населено место на планетата – најниската измерена температура таму е -71,2 °C. Можете ли да замислите како изгледа секојдневието во ваква „санта мраз“?
Ојмјакон е руско село во Република Саха, на брегот на реката Индигирка, со население од околу 500 жители.
Најниската измерена температура е -71,2 степени, додека просечната температура во градот во зима се спушта на -58 степени Целзиусови, но во текот на летото температурите може да достигнат 25-30 Целзиусови степени.
Бидејќи селото се наоѓа во близина на Северниот Пол, должината на денот и ноќта во текот на годината драстично варира – во текот на декември денот трае само три часа, а во јуни дури 21 час.
И покрај сето ова, благодарение на чистиот воздух, здравата исхрана и чистата вода, жителите на Ојмјакон се познати по својата долговечност.
Нема мобилна телефонија, бидејќи уредите можат да замрзнат во џебовите, а оние што немаат загреана гаража, не ги исклучуваат автомобилите преку ноќ, бидејќи наутро не би можеле да ги стартуваат.
Поради проблеми со замрзнатите цевки, тоалетите најчесто се наоѓаат надвор од куќите.
Живата буквално се замрзнува во термометрите, дури и мастилото во пенкалата, а кога топла вода ќе се стави во чаша и ќе се истури, се претвора во снежен облак.
Најчесто се јаде месо. Населението на Ојмјакон најмногу се занимава со сточарство и риболов. Поради екстремно ниските температури и тоа што почвата замрзнува до длабочина од 1.500 метри, не е можно одгледување жита, овошје или зеленчук, а во исхраната се вклучени и диви плодови од локални растителни видови.
Меѓу локалните специјалитети се млечните производи „хајак“ и „кјорче“, кои се слични на путерот и сладоледот, како и најпознатото ојмјаконско јадење – „строганина“ (изгребана свежо замрзната риба).
Децата одат на училиште и кога температурата ќе падне на -50. Наставата за учениците од прво до петто одделение се откажува само доколку температурата се спушти под -52 степени.
Областа е богата со експлоатативни наоѓалишта и рудници на злато, како и со топли извори, а туристите кои ги посетуваат овие области – главно го прават тоа за да ги тестираат сопствените граници.
