Шери доматите многу лесно можете да ги одгледувате во домашни услови ако следите неколку важни совети.
Прво треба да набавите семе. Постојат многу видови, но ако првпат одгледувате шери домати, почнете со обична сорта. Потребни ќе ви бидат само неколку семки, бидејќи две билки се сосема доволни за едно средно домаќинство.
Најдобри сорти за наши услови се средно рани и доцни. Садниците можете да ги набавите и од пазар. А ако изберете семе, засадете го во саксии полни со мешавина од земја и тресет. Поставете ги на сончево место. Можете да користите празни канчиња од кисело млеко или мини саксии од цвеќарница.
По еден месец расадот е подготвен да го пресадите во поголеми саксии во кои ќе ставите природно ѓубриво. Избирајте јаки и добро развиени садници. При садење цел корен треба да влезе во земјата до зелениот дел од стебленцето. Потоа дополнете со земја и полејте со вода. Чувајте ги на јужна тераса. Полевајте ги секои два дена. А на две недели поѓубрете со течно ѓубриво.
Кога доволно ќе порасне стеблото, покрај него ставете дрвена летва за да стои нагоре и да цвета. Врвот скинете го на растојание од еден или два листа над цветот. Ако во основата има нови стебленца, отстранувајте ги редовно. И чекајте ги првите плодови.
