Официјалното име на големата и прекрасна крава Холштајн е S-S-I Doc Have Not 8784-ET, а во јуни годинава беше продадена на аукција во САД за 1,925 милиони американски долари (1,880 милиони евра). Цената го урна претходниот рекорд во САД, а според пишувањето на DairyGlobal, и во целиот свет.
Одгледувачите велат дека блеска од здравје. Таа е една од 6-те женки Холштајн кои во последните неколку децении се продадени за повеќе од еден милион американски долари. Четири од нив се уште се продуктивни, рече Кевин Јоргенсен, аналитичар за оваа раса во американската компанија за генетика Select Sires, која е сопственик на првиот машки подмладок на Доц.
Доц ќе има речиси пет години, а денес има повеќе сопственици. Еден од нив е Том Куглер од AOT Genetics кој ја одгледал нејзината мајка.
Интересно е што гледајќи ја нејзината генетика, нејзиното потекло достигнува 10 генерации наназад, што е околу 30 години, до крава која според многумина е меѓу неколкуте најдобри меѓу од оваа раса.
Генетски, таа е посебна поради неколку причини. Нејзиниот сегашен индекс на вкупна геномска ефективност (Genomic Total Performance Index – GTPI), кој се ажурира на секои три месеци, е 2742. Тоа не е толку ретко, но ретко е кај крави на оваа возраст. За споредба, најдобриот бик Холштајн во светот има GTPI од над 3200. Но, Доц родила 3 женски потомци со GTPI од над 3035.
„Тоа значи дека го има она што се нарекува висока генетска преносливост“, објаснува Јоргенсен. „Нејзиното потомство има резултати многу над просекот на нејзините родители. Врз основа на она што го гледаме со нејзиниот подмладок, таа ги пренесува и во однос на производството и на фенотипот“, заклучува тој.
