Македонските земјоделци со нетрпение ги очекуваат субвенциите. Неофицијално, како што пренесува Зелена берза, први ќе бидат исплатени одгледувачите на крави, основна мерка и пчеларите најверојатно во петок, а можеби и уште утре, додека за одгледувачите на овци се уште не се подготвени исплатите.
Во текот на вчерашниот ден министерот Љупчо Николовски информираше дека од месецов започнува исплатата на заостанатите долгови кон земјоделците.
„Од овој месец согласно утврдената динамика започнува исплатата на заостанатите обврски кон земјоделците. 2022 година ќе биде година во која државата до денар ќе расчисти со долговите кон земјоделците, но и година во која за прв пат ќе започне авансна исплата на субвенциите, најпрво кај овоштарите.“, рече Николовски.
