Министерката за финансии Гордана Димитриеска-Кочоска денеска ќе ја отвори Регионалната конференција „Охрид 2026“, која ќе се одржи во хотелот „Инекс Олгица“ во Охрид и ќе биде посветена на фискалната отпорност, буџетските политики и економските предизвици во регионот.
Како што соопшти Министерството за финансии, Димитриеска-Кочоска ќе има воведно обраќање на отворањето на конференцијата со почеток во 9:45 часот.
Министерката ќе учествува и на панел-дискусијата на тема „Од притисокот во еврозоната до фискална отпорност: Буџетски приоритети, реалности во приватниот сектор и регионални лекции“, на која ќе се разговара за влијанието на економските движења во Европа врз јавните финансии и деловното опкружување во регионот.
На конференцијата ќе учествуваат министри за финансии, директори на даночни администрации, владини претставници и економски експерти од земјите во регионот.
Според организаторите, конференцијата има за цел да придонесе кон зајакнување на фискалната отпорност, одржливиот економски развој и регионалната соработка во услови на сè покомплексна глобална економска средина.
МИА
