Појасите со трска на охридското крајбрежје од селото Подмоље до Свети Наум се поставени на дигитална мапа во рамки на проектот „Мапирање и управување со трската во Охридското Езеро“ што го реализира Здружението за заштита и одржлив развој на животната средина ‐ Регионален зелен центар Охрид.
Од Општина Охрид појаснуваат дека се работи за дигитална интерактивна мапа на која се одбележани појасите на трска на крајбрежјето на нивна територија.
– Со клик на секој од појасите се појавува легенда за него, која содржи информации добиени од теренските истражувања во однос на должина и ширина на појасот, вкупна површина и споредба на површината во однос на претходни постари мерења, слики и кратки информативно- едукативни видеа, информираат од Општина Охрид.
Целта на активноста, како што соопштија, е промоција на природното наследство и подигнување на јавната свест за значењето и потребата од правилно управување со трската во Охридското Езеро.
– Од аспект на едукативен карактер, мапата ќе служи како помагало во образовниот процес во основните училишта, со цел учениците да развијат поголема свест за животната средина и конкретно за трската. Од информативен аспект, ќе служат да и ја доловат на јавноста вклучувајќи ги и туристите, реалната состојбата во која што се наоѓа трската, како и потребата од превземање соодветни мерки, стои во информацијата на Општина Охрид. До мапата може да се пристапи преку линкот https://rzc-ohrid.com/?page_id=1064
Проектот „Мапирање и управување со трската во Охридското Езеро“ се реализира во рамките на Регионалната програма за локална демократија во Западен Балкан 2 – ReLOaD2, финансирана од Европската унија, а ја спроведува Програмата за развој на Обединетите нации (УНДП).
