Аукциската куќа Christie`s ставила на приватна продажба шише француско вино кое, како дел од експериментот на лозовите насади во Бордо, 14 месеци созревало во орбитата на Земјата, а се проценува дека цената би можела да достигне еден милион долари.
Оваа понуда на виното „Петрус“ берба 2000 година, ексклузивно црвено вино од светска класа произведено од грозје „мерло“ во винскиот регион Померол во Бордо, беше објавена во вторникот во Лондон, пренесe Декантер.
Приходот ќе биде наменет за приватната европска ракетна компанија „Space Cargo Anlimited“, која лансирала 12 шишиња „Петрус 2000“ на пат кон Меѓународната вселенска станица во ноември 2019 година, како дел од серијата експерименти во лозарството и микрогравитацијата.
Десетина шишиња „Петрус“ биле вратени на Земјата од вселенската станица во јануари годинава во товарната капсула „Спејс Икс“ откако поминале скоро 440 дена во орбитата, на оддалеченост од 300 милиони километри од Земјата.
По враќањето во Бордо, било отворено едно шише вино на Институтот за истражување на вино и винова лоза, а десетина водечки енолози го споредиле вкусот со примерок од „Петрус“ од истата берба кое созреало на Земјата.
Двата примерока биле оценети со 98 поени, иако експертите тврдат дека почувствувале разлика во вкусовите.
Од „Christie`s“ навеле дека во рамки на приватната продажба, едно шише од „вселенската колекција“ е понудено за продажба веднаш, заедно со шише од оригинален „Петрус 2000“, плус декандер, сет чаши и отворач за тапи направен од метеорит.
Едно шише од бербата „Петрус 2000“, од имотот од 28 хектари што произведува само околу 30.000 шишиња годишно, обично чини 5.366 американски долари, а едно е продадено на аукција во 2018 година за 51.660 американски долари.
