Цените на житарките минатата недела паднаа на најниско ниво во последните седум месеци, и тоа за речиси 30 евра по тон или за осум отсто, пишува Агрархеуте.
Овој тренд е поттикнат од растот на извозот на житарки од Украина. Имено, од договорот за коридорот за испорака, од таа земја се испорачани повеќе од 622.000 тони, што е голем притисок врз светските цени на житарките. USDA го проценува украинскиот извоз за сезоната 2022/23 на 30,4 милиони тони, што е значително повисоко од јулската прогноза од 22,6 милиони тони.
Цената на пченицата на европскиот термински пазар минатата недела падна на нешто помалку од 314 евра за тон за првиот септемвриски договор.
На берзата во Хамбург лебната пченица во четвртокот чинеше 317 евра за тон, а понудите за добиточен јачмен биле 290 евра за тон. Во француското извозно пристаниште Руан во петокот цените на пченицата изнесуваа 314 евра за тон, а на јачменот 272 евра/т.
Освен зголемениот црноморски извоз, на овој тренд влијае и прогнозата за високиот род во Русија и Индија, тврдат аналитичарите.
Руската консултантска компанија SovEcon ја зголеми прогнозата за жетвата на пченицата за оваа, 2022 година, на 94,7 милиони тони од претходно очекуваните 90,9 милиони тони.
Прогнозата е зголемена поради рекордно високиот моментен принос на пченица во многу региони и подобрата состојба на пролетната пченица по дождовите кои наврнаа претходните недели, соопштија тие.
Покрај тоа, Меѓународниот совет за житарки (IGC) ја зголеми својата прогноза за глобалното производство на пченица во сезоната 2022/23 за 8 милиони тони на 778 милиони тони.
Сепак, значително ја намалија прогнозата за глобалното производство на пченка за 10 милиони тони на 1.179 милиони тони. Причината се намалените изгледи за жетва во Европската Унија и во САД.
