Секоја идеја која ја имате независно од тоа дали станува збор за почетна инвестиција или пак посточеки бизнис налага потреба од изготвување на бизнис план. Иако звучи комплицирано, сепак се работи за една многу едноставна работа во која на јасен и директен начин треба да ги искажете вашите планови,кои начини и методи ќе ги употребите доколку добиете земјоделско земјиште под закуп и како сето она што го планирате и замислувате ќе се оствари во наредниот период.
Овој бизнис план, всушност треба да бидете вие, да размислете колку можете гледајќи реално на состојбите , вашите можности и шанси да успеете, целта за која ќе го користите земјиштето кое го барате под закуп и она што очекувате како бенефит, односно прозводно – економски резултати од вашиот труд.
Мора да напоменеме дека овој пишан документ или т.н бизнис план е многу важен за вас но и документ кој во иднина ќе ви биде потребен кога ќе имате потреба за финансиска поддршка, заем или пак апликација за кредит.
Бизнис планот треба да опфаќа основни податоци за семејството, техничко -технолошката опременост, целта за која ќе го користите земјиштето и пазарните аспекти и износ на планирана инвестиција. Овде најчесто се поставуваат прашањата, на кого ќе го продадам производот, по која цена, како и на кој начин, со што автоматски се стигнува и до делот за финансиите. Овој дел од бизнис план всушност укажува на проценките, резултатите кои ги очекувате откако ќе ја реализирате вашата идеја и ефектите од тоа.
Закупецот е должен на секои пет години да доставува извештај до Министерството за земјоделство, шумарство и водостопанство за реализација на бизнис планот, односно програмата од членот 25 на овој закон за користењето на земјоделско земјиште во државна сопственост кое го користи под закуп.
Многу е важно ако земјоделскиот производител како закупец не го остварува бизнис планот, земјоделското земјиште се користи спротивно на прописите за заштита на животната средина и доколку се утврди дека е дадена лажна изјава тогаш се раскинува договорот за закуп.
Во случај доколку дојде до раскинување на договорот, закупецот е должен со записник записнички да го предаде во владение земјоделското земјиште во државна сопственост по собирање на тековната реколта, но не подолго од една година од денот на раскинувањето на договорот и да ги отстрани насадите и останатите движни и недвижни ствари.
Доколку закупецот во предвидениот рок не постапи по ова и не ги отстрани насадите и останатите движни и недвижни ствари, Министерството ќе го одземе владението, истите ќе ги отстрани на сметка на дотогашниот закупец.
Закупецот чиј договор е раскинат согласно со ставот 1 од овој член нема право да учествува на јавен оглас за давање на земјоделско земјиште во државна сопственост под закуп во наредните пет години.
