Заменик претседателот на Владата задолжен за економски прашања, координација на економските ресори и инвестиции, Фатмир Битиќи, денеска го посети „Меѓународниот саем во Тирана 2021″, во организација на „групацијата Клик Експо” во соработка со градот Тирана, Стопанската комора на Албанија и Коморскиот инвестициски форум за Западен Балкан.
На Меѓународниот саем, што е во рамки на иницијативата „Отворен Балкан”, со слоган „Еден Балкан, посилен Балкан”, изложуваат над 500 компании од сите земји на Западен Балкан и други 25 земји од светот.
Вицепремиерот Битиќи, по обиколката на штандовите на саемот, соопштија од неговиот Кабинет, потенцирал дека ваквите настани, на кои заеднички се презентираат производите и услугите на компаниите од нашиот регион, може да придонесат да се зацврсти и засили економската соработка во Западен Балкан, но и да се подигне конкурентноста на самиот регион.
– Поголема конкурентност на Западниот Балкан, наместо создавање на конкуренција помеѓу земјите, значи подобра соработка, стабилен и поатрактивен регион, поголеми можности за привлекување на инвестиции и овозможување на подобри работни места за сите наши граѓани. Заеднички треба да продолжиме да работиме во насока на уште подобра соработка на регионално ниво, да донесеме мерки со кои ќе ги унапредиме меѓусебните економски односи, а со тоа да дадеме сигнал за стабилен и сигурен регион, отворен за нови инвестиции и олеснување на сите трговски процеси, нагласил вицепремиерот Битиќи за време на посетата на Меѓународниот саем во Тирана.
Тој се сретнал и со претседателот на Стопанската комора на Северна Македонија, Бранко Азески и притоа му честитал за наградата на комората „Дигитален шампион”, за проектот за дигитализација на процесите и издавање е-документи од страна на Комората, што им се потребни на македонските компании во надворешно-трговското работење, добиена од Светската трговска организација (WTO), Mеѓународната стопанска комора (ICC) и Меѓународниот центар за трговија (ITC)
