Центар за промоција „Тера вино” беше отворен денеска во Росоман, во рамки на прекуграничниот проект со Грција финансиран од Европската Унија, а во кој учествуваат Фондацијата ,,Тиквешки вински пат” и росоманската локална самоуправа.
Виолета Јанкова, извршен директор на Фондацијата, потсети дека од 2006 година, ова е четврти ваков капитален проект. Таа изрази надеж дека за овој центар за промоција на туризмот ќе се слуша далеку, бидејќи тој ќе биде двигател на развојот.
Градоначалникот на Росоман, Стојан Николов рече дека Центарот ќе придонесе за развојот на Росоман и регионот.
Претставникот на ЕУ делегацијата, Фреик Јанмаат нагласи дека се ова одлични резултати од проектот и одличен објект.
– Се надевам дека соработка ќе продолжи и во иднина, Република Северна Македонија има голем потенцијал за развој на туризмот. Има многу да понуди, храна, вино, пејзажи и места кои заслужуваат да бидат посетени, рече тој меѓу другото, споменувајќи го и здравствениот туризам како можност.
Според претставникот на еден од партнерите од Грција, Марко Дипола од италијанско – грчката стопанска комора, станува збор за изградба на многу добар проект. Изрази надеж за понатамошна соработка и информираше дека пред две седмици се одржал вински натпревар во Солун, а вина од овој регион биле наградени.
Наградите ќе им бидат доделени на претстојната конференција во Тиквешијата.
На настанот присуствуваше и заменик министерот за земјоделство, шумарство и водостопанство, Трајан Димковски.
