Италија секоја година низ т.н Decreto Flussi избира одреден број мигранти кои не се жители на ЕУ, а на кои им е дозволен влез во земјата за да работат во земјоделството.
Ѓорѓио Гори, градоначалникот на Бергамо, еден од најтешко погодените градови од корона вирус, ја замоли италијанската влада да го забрза издавањето на годишната уредба со кој редовно се регулира бројот на работници мигранти кои не се од ЕУ , бидејќи Италија има сериозна потреба од работници во земјоделството, наведува Еуроактив.
Имено, оваа земја секоја година низ т.н Decreto Flussi (во слободен превод Уредба за проток) се избира одреден број на мигранти кои не се жители на ЕУ а на кои им е дозволен влез во земјата за да работат во земјоделството. Најчесто се ангажираат за време на бербата а минатат година таа бројка изнесуваше 30.850 мигранти.
Мигрантите не доаѓаат бидејќи се плашат од вирусот
„ Поради моменталната ситуација, ни се потребни многу работници како никогаш досега, а колку што слушнав, многу од мигрантите нема да дојдат бидејќи се плашат од вирусот. Ни требаат најмалку 200.000 работници и потребно е ова уредба што поскоро да се спроведе бидејќи во спротивно земјоделскиот сектор ќе се најде во тешка ситуација“, предупредува Гори.
Меѓутоа има и такви кои никако не се согласуваат со неговата изјава. Еден од примерите е антимигрантската партија Леге.
„Неверојатно е среде кризата која ја преживуваме да постои некој кој се занимава со луѓето од другите земји, наместо да смислува начин како да ги заштити своите италијани“, изјавил Марко Зани, претставник во Европскиот парламент и лидер на партијата.
Повеќе од 370.000 сезонски работници од целиот свет
Според податоците на италијанската организација на земјоделци Coldiretti, во земјата секоја година влегуваат повеќе од 370.000 сезонски работници од целиот свет кои придонесуваат за производсто на 25% од храната.
„Романците се тие кои вршат лавовска работа, а доаѓаат околу 100.000 секоја година. Оваа година ќе ни биде проблем ако поради вирусот не би можеле да дојдат“, изјавил Гори.
Особено се загрижени и во областа Венето, каде се потребни најмалку 65.000 работници за работа во тамошните земјоделските стопанства. За неколку недели таму почнува бербата на јагоди, шпаргли и тиквички, а ако нема кој да ги собере се ќе пропадне.
Минатата година на ова подрачје биле ангажирани 79.000 сезонци а дури три од пет биле од други земји, главно од Источна Европа.
Напишете коментар