Директното покривање на растенијата се изведува со агротекстилна или со перфорирана фолија. Во пракса, агротекстилот наоѓа голема примена.
Агротекстилот е полипропиленски синтетички материјал кој се користи за покривање на никнати пресадени или веќе развиени растенија. Поради исклучително малата тежина (17-60 г/м2) растенијата директно се покриваат без употреба на носечка конструкција.
Со употребата на агротекстил се создаваат поволни микроклиматски услови за растенијата. Почвата под агротекстилотот побрзао се загрева преку ден, а поспоро се лади ноќе, што ги штити посевите од поголеми температурни разлики. Температурата под агротекстилот е 2-4 ºC повисока во однос на околината, што доведува до поголема продуктивност на растението и порано созревање за 10 или повеќе дена, пишува Агросавјет.
При наводнување или кога врне дожд, водата полека поминува низ микропорите на ткаенината и рамномерно ги наводнува растенијата и почвата, а потоа почвата постепено се суши и не се формира кора.
Водата постепено испарува низ микропорите, така што не се формира кондензат. Со задржување на водата во микропорите кога паѓа температурата, се создава тенка ледена обвивка која спречува температурата под ткаенината да продолжи да се намалува. Агрилот исто така има многу важна функција во заштитата на растенијата од болести и инсекти, поради што употребата на пестициди е значително помала.
Посевите што се покриени со агрил можат, доколку е потребно, да се наводнуваат со вештачки дожд или на кој било друг начин без потреба агрилот да се отстранува.
Времето на употреба на агротекстилот зависи од видот што се одгледува, при што главната задача на агрилот е да ги заштити растенијата од ниски температури. Во производната практика, агротекстилот се користи за покривање на растенијата во доцна есен или рана пролет, кога придонесува и за спречување на негативните ефекти на ветерот врз растенијата и почвата.
Кога се поставува агротекстил
Директното покривање на растенијата се изведува по сеидбата или по садењето или истовремено со садењето. Покрај тоа, може да се користи во заштитени области, без оглед на тоа дали се загреваат или не, во форма на дополнителни ниски тунели при производството на расад или за време на производствениот циклус на кој било вид зеленчук.
Новите генерации на агрил се УВ-стабилизирани, траат три или повеќе години и имаат различна ширина и должина.
