Кога корењата на растенија се во недоволно аерирана средина имаат дегенерација на коренот во својот развој. Тоа се одразува на поголем пречник на коренот како и на зголемен меѓуклеточен простор во него, кој негативно се одразува на самата улога на кореновиот систем, а од друга страна директно се одразува на стабилното и сигурното производство.
Аерацијата освен што влијае на градбата на кореновиот систем, делува и на неговиот раст. До драстично намалување на растот на кореновиот систем доаѓа кога концентрацијата на кислород ќе се намали на 15% во атмосферата на земјиштето.
Аерација на земјиштето
Концентрацијата на јаглерод диоксид поголема од 2% делува неповолно, бидејќи неговото присуство спречува делба на клетките во делот (апикалниот меристем) каде што е очекувано зголемување на кореновиот систем.
Од наведените причини многу е значајно со правилна обработка, одводнување, примена на органски ѓубрива и други активности да се обезбеди таква структура на земјиштето во која ќе има доволно пори исполнети со воздух, бидејќи тоа е еден од предусловите за нормален раст на кореновиот систем.
