Стравот од евтините руски житарки ги мачи главните извозници на пченица во Европската Унија. Меѓународната побарувачка е помала, поради што извозниот вишок се пренасочува кон Мароко и Кина, пишува Ројтерс.
Пред една година ситуацијата беше сосема поинаква, бидејќи тогаш откупувачите побрзаа да резервираат пченица од земјите на ЕУ поради прекините во трговијата со Црното Море предизвикани од руската инвазија на Украина.
Русија наводно има големи залихи од рекордната жетва минатата година, деновиве започнува новата од која се очекува и голема реколта, а прогнозерите предвидуваат ново високо ниво на извоз.
Цени на пченицата на готовинскиот пазар
Кога станува збор за пченицата од ЕУ, некои аналитичари предвидуваат поголем извоз оваа сезона бидејќи се очекува поголема жетва, додека други предвидуваат нејзин поскромен раст токму поради руската конкуренција. „Руската пченица е главната закана за извозот на ЕУ во наредните недели и месеци“, вели еден европски трговец.
Според некои информации, пониската извозна цена во Русија е 230 долари за тон за FOB (free on board FOB, транспортна клаузула според која продавачот ја исполнува својата обврска кога ја испорачува стоката преку оградата на бродот на назначеното пристаниште за утовар) кое се уште е поевтино за околу 25 до 30 долари од понудата за овој вид трговија во Западна Европа, пренесува Agroklub.
Некои аналитичари сметаат дека за тоа е виновен растот на фјучерсите на Euronext, што беше поттикнато од сушата во САД.
Земјата која би можела да биде клучна за пченицата од ЕУ е Мароко, која со планираните 2,5 милиони тони минатата сезона го престигна Алжир како главно одредиште. Вкупниот извоз на ЕУ во 2023/2024 година сепак, би можел да се зголеми од источните земји како Романија, кои имаат големи залихи по приливот на украинските житарки.
