Во изминатава седмица стабилното и суво време преку денот сончево и релативно топло, допринесе за пролетното будење на овошките, особено оние од коскестите видови, кои и вообичаено се првите видови, посебно во јужните краишта и Повардарието каде бадемот, сливата џанка и кајсијата се расцветани или се во почеток на цветање. Кај некои сорти на овошни видови, доколку не се насадени садниците, тоа успешно може да се изврши и во март до потерување на пупките. Во тек е и пролетната сеидба за некои градинарски култури, спањак, морков, салата. Во поладните реони (Источна и западна Македонија) пролетната салата се произведува преку расад, произведен во полутопли леи. Се сее февруари, стасува за 5 седмици. Во зависност од реонот, се расадува од втората половина на март и во почетокот на април (марулата). Исто така и есенските посеви продолжуваат со нивниот развој. Овие временски услови се погодни и за предсеидбена обработка на почвата за некои култури. Обработката на почвата за пролетна сеидба во пролет се состои од површинска и предсеидбена припрема. Површинската обработка треба да се изврши со што помалку наврати. Доколку основната обработка била квалитетно извршена и ако површината е рамна, предсеидбената припрема може да се изврши во еден до два наврати. Длабочината на оваа припрема треба да се прилагоди спрема длабината за одредени култури. Многу е важно пролетната припрема да се врши на веќе просушена почва т.е при поволна физичка зрелост на почвата за обработка.
Во следните два дена ќе се задржи претежно стабилно и сончево време со мала до умерена облачност. Во деновите од викендот и во почетокот на новата седмица времето ќе биде променливо облачно со повремени локални врнежи од дожд.
Ваквите временски услови се добредојдени за изведување на работи во поле, припрема на површините во пластеничкото производство, прихранување на есенските посеви, припрема на почвата за сеидба на раните пролетни култури, садење на одредени рано градинарски култури како и други агротехнички мерки.
Минималната температура ќе се движи во интервал од -4°C на повисоките места, до 6°C, а максималната температура ќе се движи во интервал од 12°C до 20°C.
