Автопатот Кичево Охрид ќе поскапи но по се изгледа ќе треба и повеќе време додека да се пушти целосно во употреба. Премиерот Мицковски потврди но не прецизираше колку пари и од каде ќе се позајмат за довршување на трасата само рече дека поскапувањето е поради свлечиштата на неколку локации кои биле покомплицирани од претходните.
За овој автопат долг 57 км досега се потрошени околу 600 милиони евра.
Вчера беа пуштени 20 км од делницата, иако Владата најавуваше дека ќе се отворат 40км со прекин кај Ботун.Покрај црвените ленти и свеченото отворање премиерот заедно со министерот за транспорт Николоски со автомобил прошетаа низ делницата па дадоа ветување дека како и да е, овој автопат ќе да се доврши.Но неговото пуштање ќе е етапно бидејќи премиерот најави во август да се пуштат уште 18км. За опозициската СДСМ проектот е “фушерај” кои тие го спасиле.
„Кичево–Охрид е симбол на погрешен избор на модел на изградба од страна на ВМРО-ДПМНЕ, проект започнат од Груевски само за политичко сликање, без геомеханички испитувања, без комплетен основен проект и со штетни последици за граѓаните.СДСМ го спаси проектот од целосен колапс и го донесе до финална фаза, со трајни и безбедни решенија за граѓаните и за државата.” – велат од СДСМ.
Во меѓувреме граѓани кои живеат до автопатот и понатаму реагираат дека се блокирани и немаат направен пристапен пат.Никој не им кажал ниту објаснил од каде ќе стигнуваат до домовите. Дополнително што голем дел од нив сеуште се во судски процес за експропријација на земјиштата.
За потсетување, овој автопат почна со градба во 2014 година и од првично предвидените 374 милиони достигна вредност од 598 милиони евра. Не е завршен и покрај неколкуте анекси на договорот со кинески „Синохидро“ со кои во повеќе наврати беа продолжени роковите, најчесто поради проблеми со земјиштето. Во повеќе наврати досега домашни и странски инженери градежници и експерти од областа потенцираа дека проектот е згрешен од самиот старт.
