Актуелните случувања во државата со воведувањето на вонредната состојба поради пандемијата предизвикана од корона вирусот, ги засега сите граѓани, а директно влијае на стопанството и земјоделското производство.
Разговараме со сопственикот на компанијата „Хемометал“ – Битола, Мирко Велковски за моменталната состојба и мерките кои треба да ги превземе Владата за поддршка на агросекторот.
-Земјоделците се подготуваат за пролетните активности, доаѓаат во нашата компанија но многу се внимателни, ги почитуваат препораките на Владата . Единствено се плашат дали ќе има доволно ѓубрива и сите други неопходни репроматеријали. Во овој момент многу е важно на фармерите навреме да им бидат исплатени парите за млекото, што значи трговците треба што поскоро да си ги завршат обврските кон млекарите – вели Велковски.
Велковски добро ги познава состојбите во агросекторот, како сопственик и на млекарницата „Вемакс“ и претседател на Регионалната стопанска комора во Битола, посочува дека постои можност да се злоупотреби намалената активност на судовите, но УЈП треба да ги превземи сите мерки и да ја подобри финансиската дисциплина во овој сектор.
-Исто така, сега е време кога Владата, како во многу други земји во Европа, да донеси закон со кој рокот на плаќање на фактурите за леб и млеко ќе биде најмногу до 15 дена, а не како до сега , 60 или 90 дена или пак уште полошо фактурите да се наплаќаат по судски пат – изјави за Агротим, сопственикот на Хемометал, Мирко Велковски.
Битолската компанијата Хемометал веќе 30 години е вистински партнер на земјоделците и агробизнисмените. Основана во 1990 година со единствена цел и визија да се учеставува во развојот на македонскиот агрокомплекс преку модернизација на производството.
