Животот во руралните средини носи многу предизвици, интересни моменти во кои се вткаени труд и посветеност но и можности за создавање автентични производи кои ја раскажуваат приказната за традиционалното. Пример за ова е Кристина Стојчевска е главен иницијатор за организирање на настани кои ја промовираат општина Ранковце на саеми и манифестации од ваков тип во земјава.
-„Учествувавме на манифестации за промоција на храна и традиционални производи, заедно со други жени од нашата општина, како на пример минатогодишното учество на саемот „Од нива до трпеза“, а би сакала да го издвојам и нашето учество на почетокот на овој месец во Куманово на манифестацијата „Органска трпеза“. Сметам дека ова се најдобрите начини на пошироката јавност да и се претстави домашното производство каде што ние жените ги споделуваме своите производи, разменуваме искуства и ја промовираме вредноста на домашно подготвената храна“, вели Стојчевска.
Кристина Стојчевска заедно со групата жени од општина Ранковце по трет пат го организираа настанот посветен на Меѓународниот ден на руралната жена 15 Октомври каде на просторот пред општината а со поддршка на градоначалникот презентираа традиционална храна и домашни призводи кои со љубов и умешност ги подготвувале за своите граѓани.
– Имавме, домашни традиционални јадења, гравче тавче, ориз со копани, пинџур, зелник со сирење, праз, тиква, пецива и останати специјалитети, производи подготвени од природни состојки и храна направена по стари традиционални рецепти. Од нива до трпеза традицијата живее преку нашите жени“, потенцира Стојчевска.
Градоначалникот Даниел Павловски порача дека руралната жена е симбол на трудољубивост, посветеност и истрајност. Со својот труд, знаење и пожртвуваност, таа има незаменлива улога во земјоделското производство, зачувувањето на традицијата и развојот на руралните средини.
-” Како градоначалник, ја препознавам и ја ценам нејзината улога во развојот на нашата општина. Жените од руралните средини се темел на семејството, чувари на нашите вредности и важен двигател на локалниот економски развој. Наша обврска е да создаваме подобри услови за нивна работа, економско јакнење и активно учество во општествениот живот, истакна Павловски.
Приказната за руралната жена е приказна за вредни раце, знаење што се пренесува од генерација на генерација и љубов кон сопственото наследство. Со својата работа, таа докажува дека руралните средини располагаат со голем потенцијал, а жените се важен двигател на нивниот развој.
Поддршката на ваквите иницијативи е важен чекор кон зачувување на традиционалните вредности, промоција на локалните производи и создавање подобри можности за жените во руралните средини.
