Повлекување на одлуката за зголемување на нотарските тарифи, најави денеска министерот за правда Игор Филков на брифинг со новинарите. Одлуката која ја донесе неговиот претходник Кренар Лога требаше да стапи на сила од 1 септември, а со неа цените за услугите на нотарите ќе беа зголемени за десет пати повеќе.
„Ова нема да се случи, затоа ќе ги повлечам измените за новата тарифа. Вака не се работи. Не смее народот да плаќа нешто 10 пати повеќе, односно не смеат да се носат одлуки без да има широка дебата, без да слушнеме што мислат за тоа сите засегнати страни“, изјави Филков.
Одлуката била донесена во февруари, а дури после изборите, односно на 6 јуни техничката Влада дала одобрение, по што истата била објавена во Службен весник. Според министерот Филков, за одлуката никој не ја информирал јавноста и процесот на нејзиното донесување бил таен.
„За промената на цената по кој бил основ мора да има сериозна анализа. Мора да има утврдена потреба од сериозно зголемување, како што предвидел претходниот министер, кој од неразбирливи причини терал некоја агенда за поскапувањето“, додаде Филков.
Извор: Телма
