Кога се сака, се може. Тоа е девизата под која работи овоштарот Гоце Митевски од Штип. Еден е од ретките во државта кој го работи она за што учел. Овој дипломиран земјоделски инженер го продолжил семејниот бизнис. Пред десет години почнал со насади на вишни, сега освен за нив се грижи и за насади на цреша и слива на вкупно 100 хектари во атарите на селата Балван и Лакавица.
„ Почетокот беше тежок но со поткрепа на кооперанти и банките успеавме да подигнеме еден дел од насадите. Почнавме да учествуваме во програмите на Министерството за земјоделством и со субвенциите успеавме да подигнеме големи насади“, вели Митевски.
Митевски вели дека без субвенциите и подршката преку програмите на Министерството за земјоделството, тешко може да се размислува за развој. Затоа учествува на сите национални програми за подршка на земјоделството, а се модернизира и преку ИПАРД програмата.
„Редовно учествувам и сум реализирал 80 % од зацртаното досега. Имам земено од главна механизација трактори, машина за берба. Имам земено и приклучна механизација, мулчери, атомизери“, раскажува Митевски.
Иако многу земјоделци реагираат на обемноста на документацијата, за овој овоштар од Штип, тоа е најмала пречка за понатамошен развој. Вели важно е да се добие помош при подготвката на апликациите, а на отворени врати секогаш наидувал во Подрачната единица на МЗШВ.
Повеќе од репортажата на Виолета Кожинкова за Агротим.мк
