Владата на Србија ја усвоила одлуката за воведување прелевман (увозна такса) од 15 динари за литар млеко и 30 динари за килограм за кашкавал гауда.
По неколку средби на министерката за земјоделство, Јелена Танасковиќ со претставници на производители на млеко и млечни производи, договорено е да се воведат прелевмани (увозни такси) за увоз на млеко и млечни производи, со цел да се заштити домашното производство од прекумерен увоз, соопштиле за Танјуг од Здружението на млекопроизводители на Мачванскиот округ.
Претседателот на здружението, Горан Васиќ, ја поздравил одлуката на државата и посочил дека тоа е добра мерка за млекопроизводителите.
„Со нашите барања дадовме до знаење дека приоритет над сите приоритети е заштитата на домашното млекопроизводство бидејќи дојдовме до дното што се однесува до производството на млеко. Дојдовме до овој момент кога владата ја донесе конечната одлука за воведување прелевмани. Тоа е изнудена одлука, но најдобра можна во овие околности, а Министерството и Владата ја имаат нашата целосна поддршка за нејзино спроведување. Тоа е најдобрата можна одлука по забраната за увоз на млеко, која во моментов е неизводлива“, рече Васиќ.
Наведува дека српскиот пазар е преплавен со млечни производи кои се нелојална конкуренција на домашните. Така, вели тој, увозниот кашкавал се продава по цена од 3,5 до 4 евра, иако во Европа неговото производство чини 6 евра.
Воведувањето на прелевманот треба да донесе ред во оваа област, посочи тој.
„Мислам дека нашата влада нема да има проблем да и докаже на Европската комисија дека оваа одлука е исправна и изнудена, бидејќи фактот што Кинезите се повлекуваат од европскиот пазар и ги раскинуваат договорите за откуп на некои млечни производи, особено сирењата, зборува се. Така дојдовме во апсурдна ситуација, бидејќи за килограм кашкавал се потребни шест евра, бидејќи литар млеко во Европа е околу 58 евроценти, а овде го продаваат за три и пол и четири евра. Едноставно, тој кашкавал има рок на траење и сакаат да се ослободат од него. Исто и кашкавалот гауда. Сакаат да се ослободат од него надвор од европскиот пазар, па нашиот пазар сега е затрупан со тие производи“, додава Васиќ.
