Потрошувачката на палмино масло во биодизелот и храната во Европската Унија значително ќе се намали во следните 10 години, што ќе доведе до остар пад на увозот, прогнозира Европската комисија.
Од 2019 до минатата година, палминото масло сочинуваше приближно една четвртина од произведениот биодизел, а до 2032 година неговото учество треба да се намали на девет отсто, проценува ЕК во извештајот за земјоделството во периодот од оваа година до 2032 година.
Според директивата на ЕУ за обновливи извори на енергија, горивата на база на палмино масло, за кои се вели дека се поврзани со уништувањето на шумите, ќе бидат постепено укинати до 2030 година. Одлуката предизвика негодување кај двата најголеми светски производители на палмино масло, Малезија и Индонезија.
Уделот на поновите видови биодизел треба да се зголеми на 42 отсто до 2032 година, од 29 отсто во 2019/2021 година. Уделот на биодизелот од отпадни масла и масти треба да се зголеми од 23 на 26 отсто, а учеството на другите нови видови биодизел од шест на 16 отсто.
-Главен двигател на тоа зголемување ќе бидат конкретните цели за мешавина во категоријата нови биогорива и фактот што тие носат двојна вредност при пресметувањето на резултатите за усогласеност со пропишаните цели за мешање – се наведува во извештајот.
Уделот на другите растителни масла, пред се маслото од репка, во производството на биодизел треба да остане релативно стабилно на 50 проценти. Употребата на растителни масла во храната треба да се зголеми за 2,9 отсто до 2032 година во однос на просекот во 2020/2022 година, на 10,6 милиони тони.
Сепак, напорите за намалување на употребата на палминото и соиното масло би требало значително да ја променат сегашната „рамнотежа на силите“.
Така, употребата на палминото масло во храната треба да се намали за 35,7 отсто, а на маслото од соја за 23,5 отсто. Употребата на масло од репка треба да се зголеми за 12,6 отсто, а на сончогледово масло за 27,5 отсто.
Ова приближно ќе го преполови увозот на палмино масло во ЕУ на 3,3 милиони тони до 2032 година.
