Заштитата на овошните дрвја од глодари и срни се прави за да се зачуваат кората, гранките и корените со цел да се обезбеди опстанок на садниците. Во продолжение ќе ги наброиме хуманите методи кои не им штетат на животните и на природата.
Од глодарите кои го оштетуваат овошјето ќе ги споменеме зајаците и глувците.
Глувците презимуваат во купишта трева и сено, како и во арското ѓубриво, така што ѓубривото треба да се внесе во земјата со фреза, а тревата што служи како малч околу садниците, доколку е дебел слој, да се отстрани преку зима.
Најдобра заштита од зајаци и срни е да го оградите овоштарникот со плетена жица, но тоа е и голема инвестиција. Следниве мерки за заштита, кои ги применувале и нашите предци може да се применат како помошни мерки против зајаци кои предизвикуваат оштетување со лупење на кората и гризење на гранчињата на овошките:
-свинска маст се загрева во тенџерче, најдобро тоа да биде надвор од куќата и се додава рибјо брашно околу два кг и потоа со таа смеса се премачкува дел од садниците.
-свежо исечените гранки се расфрлаат околу овоштарникот, па зајакот ги гризе нивните пупки и на тој начин не ги допира садниците.
-околу садниците се ставаат стари вреќи од компири, кромид, зелка кои се врзуваат со врвка, а на нивното дно се става малку земја за да можат да стојат исправено и да изгледаат како плашила.
-како најефикасна мерка се покажало поставувањето на заштитната мрежа околу садниците. Со ножици се сечат на ширина од најмалку 30-45 сантиметри за да можат да останат без отстранување неколку години. Потоа се ставаат околу садниците и се хефтаат по должина, со што помало можно растојание помеѓу спојниците. Не е потребно да се прицврстува за стеблото, туку да се хефта по работ за да може стеблото да се одгледува во следните години без мрежата да го задуши, бидејќи тоа може да доведе до сушење на расадот!
Во продолжение еве уште неколку начини на кои земјоделсците се обидувале да ги спречат глодарите, зајците и срните да им го оштетат овоштарникот.
-Човечката коса ги одвраќа срните и елените. Се собира косата и се става во чорапа и се закачува на овошното дрво
-врзување ЦД/ДВД-дискови за гранките на овошките – дискот се врти, блеска и ги плаши дивечот и птиците
-дното на пластичната кеса се откинува и се врзува за стеблото на овошката или по периметарот на овоштарникот
-од пластично шише се прави ветерница која произведува звук што ги плаши животните
-лента од VHS касета за видеорекордери се развлекува низ овоштарникот
Како вие се справувате со дивечот, птиците и глодарите во вашите овоштарници?
