Засадени се садници на поранешната дива депонија во кумановско Долно Којнаре, а надлежните планираат нова локација во Куманово со борова шума, место за рекреација и уживање, соопштија денеска од ЈП „Чистота и зеленило“. Локацијата е пространа и месното население, приватен стопанственик, како и екипи на ЈП „Чистота и зеленило“ садеа 1.600 садници.
– Лани беше исчистена голема дива депонија, заедно со месното население поставени беа знаци дека тука не смее да се одлага отпад. Имаше одредени количини на смет кои се фрлаа, но веднаш се изнесуваа од наша страна. Сега насадивме садници, вкупно 1.600 зимзелени. И за наредниот период, во декември ќе насадиме дополнителна количина. Тука е планирана нова борова шума, место кое ќе послужи за рекреација и прошетки меѓутоа од друга страна се намалува и аерозагадување, дел од среднорочните мерки на општината за намалување на загадувањето, изјави директорот на јавното претпријатие Даниел Стојчевски.
ЈП „Чистота и зеленило“ претходно насади садници кај Спомен-костурницата. Ако дозволат временските услови, најави Стојчевски, во декември ќе се садат од две до три илјади зимзелени садници.
Висококвалитетни листопадни садници ќе се садат во централното градско подрачје. Во моментов вакви садници се садат кај „Монопол“ и претставуваат еден вид на заштита од издувните гасови од автопатот Куманово-Табановце.
