Во рамки на Ноќта на пазарите, тезгите на бројните виенски маркети ќе бидат отворени до 23 часот на 2 септември годинава, а покрај стандардната понуда, посетителите може да очекуваат разновидна програма со музика од сите жанрови, спортски активности, перформанси и работилници.
Виенските пазари изобилуваат со разновидна понуда. Покрај локалното овошје и зеленчук и гастрономските специјалитети, тие нудат намирници од целиот свет, од егзотично овошје и зеленчук до месни производи, риба и кавијар и ориентални зачини. За да можат граѓаните на австриската престолнина и туристите уште подолго да уживаат во нивната богата понуда, на 2 септември годинава ќе се одржи Ноќта на пазарите со продолжено работно време до 23 часот.
Посетителите на Naschmarkt, најголемиот и најпознат виенски пазар, може да очекуваат настапи на различни музичари и кулинарска програма, книжевна вечер, куклени претстави, разни работилници или јога, а љубителите на шахот можат да ги испробаат своите вештини на турнирот.
Градската управа на Виена со различни понуди и настани на пазарите се обидува да привлече уште повеќе купувачи. Во мај годинава се забележани рекордни 387.600 посетители неделно кои на виенските пазари купувале свежо овошје, зеленчук и други производи. Австрискиот главен град има вкупно 17 пазари со околу 700 тезги и 4.000 вработени. Нивната вкупна површина е 128.200 м2, што одговара на површина од 18 фудбалски игралишта.
