Хрватската млекарница „Дукат“ продолжува со постепено зголемување на откупната цена на млекото, па таа од 1 јуни ќе биде повисока за 15 липи (1.23 денари), објави вчера млекарницата, наведувајќи дека со претходните четири зголемувања од почетокот на годинава, откупната цена ќе биде повисока за 65 липи по литар (5,5 денари).
На овој начин „Дукат“ се обидува да го зачува бизнисот и егзистенцијата на нивните фармери и да обезбеди продолжување на производството на млеко на хрватските фарми „што ќе резултира со инвестиција од 105 милиони куни годишно во примарниот сектор“, велат од компанијата.
Директорот Душко Глишиќ истакнува дека сите чинители во млечниот сектор, и производителите и преработувачите, се соочени со големи предизвици поради зголемените трошоци на влезните производи и цените на енергијата, на кои, за жал, не им се гледа крајот.
„Нашите кооперанти работат во исклучително тешки услови и ние ги слушаме нивните потреби и правиме се што можеме да ги поддржиме во производството на млеко“, рече тој и истакна дека производството на млеко треба да се стави во центарот на земјоделската стратегија и со тоа да се поттикне.
Тој исто така рече дека задача на сите чинители во домашниот млечен сектор мора да биде да се подигне вредноста на млекото во целиот синџир на снабдување за да се запрат негативните трендови.
„Ја повикуваме владата итно да најде начин како дополнително да им помогне на примарните производители на млеко“, рече Глишиќ.
