Претседателот на Европскиот совет, Шарл Мишел, во понеделникот за време на посетата на Одеса изјави дека во тоа пристаниште на Црното Море се блокирани силоси полни со храна за извоз. Украинскиот град во последните денови беше цел на руски ракетни напади.
Мишел на Твитер напиша дека со украинскиот премиер Денис Шмихал разговарал за последиците од војната за украинското пристаниште.
„Видов силоси полни со житарки, пченица и пченка подготвени за извоз. Таа многу потребна храна е блокирана поради руската војна и блокадата на пристаништата на Црното Море. Тоа предизвикува драматични последици за ранливите земји. Ни треба глобален одговор“, порача Мишел на Твитер.
Премиерот на Украина изјави дека Украина секојдневно губи по 170 милиони долари поради отсечениот пристап до морето, а националниот извозен капацитет е преполовен.
„Блокирани се 90 милиони тони земјоделски производи што Украина планираше да ги извезе во земјите од Азија, Африка и Европа“, нагласи Шмихал на прес-конференцијата со Мишел во Одеса.
Тој додаде дека некои производи се извезуваат по копнен пат или железница, но дека некои резерви се во области кои се гранатирани или освоени од Русија.
Украина е глобален извозник на житарки, а претставниците на Обединетите нации предупредуваат дека блокирањето на снабдувањето со овие производи ќе ја загрози безбедноста на храната во важните земји, особено посиромашните во Африка и на други места.
Украинскиот претседател Володимир Зеленски рече дека разговарал со Мишел за време на неговата посета на Одеса.
„Важно е да се спречи кризата во снабдувањето со храна во светот предизвикана од руските агресивни дејствија. Мора да се преземат итни мерки за деблокирање на украинските пристаништа за извоз на пченица“, рече Зеленски.
