Блитвата потекнува од Медитеранот, каде што и денес растат нејзините диви роднини. Како зеленчук, блитвата се одгледува и користи околу 2.000 години. Главно се одгледува како градинарски вид.
Лисјата и стебленцата на листовите се користат во исхраната како чорба и салата. По својата хранлива вредност е слична на спанаќот. Богата е со калиум, натриум, калциум, а содржи и многу витамин Ц и бета каротен. Блитвата е многу ценета во исхраната како зеленчук кој помага во регулирањето на варењето, добар диуретик е и се препорачува против анемија кај децата и младите.
Својства на блитвата
Блитвата е двегодишно растение. Во првата година се развива длабок и разгранет коренов систем кој се задебелува во горниот дел, има скратено стебло и лисна розета. Листовите се на долги лисни дршки кои можат да бидат долги 10-25 см и широки 1-4 см. Листот има овални, прави или брановидни краеви, со мазна или закривена површина. Листот може да има зелена или жолто-зелена боја, со сјаен изглед. Дршките и краевите на листовите можат да бидат бели, црвени или зелени.
Во втората година се развива цветно стебло високо до 120 см. Цветовите се ситни, во групи од 2-6 и се опрашуваат главно со ветер. Плодот е како клопче, кое воедно служи и како семе. Во едно клопче обично има повеќе семиња, па од една клопче се развиваат 2-3 растенија.
Производство на блитва
Блитвата најмногу се произведува со директна сеидба, но можно е и производство од расад. Сеидбата на блитва е сукцесивна и може да се врши од рана пролет до крајот на јуни за летна или есенска потрошувачка или во август и септември за консумација во рана пролет. Сеидбата е на растојание меѓу редовите 20-30 см и по ред 5-30 см, додека длабочината на сеидбата е 2-4 см. Во фаза 1-2 на листот се врши проретчување.
Блитвата може да се бере околу 60 дена по сеидбата. Ако се берат млади растенија, во фаза од 5-6 листа, тогаш блитвата се откорнува од коренот. Ако бербата е од развиени растенија, се берат надворешните, целосно развиени и неоштетени лисја. На тој начин се овозможува понатамошен непречен раст на розетата и 3-5 берби од истиот род. Добар посев на блитва може да даде принос од 30-60 тони/хектар.
